Muarobaini wakazi Kivulini kutembelea KM 65 kusaka huduma za afya wapatikana

HATIMAYE kilio cha wakazi wa Kata ya Kivulini Manispaa ya Lindi, mkoani Lindi kuhusu upatikanaji wa huduma za afya, kimepata suluhu baada ya ujenzi wa Kituo cha afya Kivulini kuanza. Anaripoti Mwandishi Wetu …(endelea).

Wakazi hao ambao walikuwa wakitembea umbali wa kilomita 65 kufuata huduma za afya katika Hospitali ya Rufaa ya Sokoine, wamemshukuru Rais Samia Suluhu Hassan kwa kuikumbuka kata hiyo.

Wakizungumza kwa nyakati tofauti hivi karibuni, wakazi hao walianza kueleza machungu waliyoyaonja kabla ya ujio wa kituo hicho cha afya.

Mmoja wa wakazi hao, Hadija Nampamba amesema mwaka 2000 almanusura ampoteze mdogo wake aliyekwenda kujifungua katika Hospitali ya Sokoine na kumpoteza mtoto.

Amesema awali walikwenda katika Zahanati moja iliyopo kijijini hapo lakini wakapewa rufaa kuelekea Hospitali ya Sokoine ambapo walimpandisha mjamzito huyo katika machela kisha wakatumia baiskeli kumfikisha hospitali hapo.

“Baada ya kufika awali walitaka kumfanyia upasuaji lakini baadae wakashauri aongezewe chupa nne za maji ya uchungu, ambapo baada ya saa nne alijifungua lakini mtoto alipoteza maisha na mama akapoteza fahamu.

“Kwa kweli kama kituo hiki cha afya kingekuwepo naamini mtoto wetu angekuwepo,” amesema.

Aidha, mkazi mwingine wa kijiji cha Maloo, Katibule Abdalah mbali na kumshukuru Rais Samia kwa kuelekeza ujenzi wa kituo hicho, alimuomba aongeze kituo kingine ili kumaliza tatizo la huduma za afya katika kata hiyo.

“Ninamuombea Mwenyezi Mungu amuweke salama kwa sababu wakazi wa kata hizi tulikuwa nyuma sana. Tunamuoma atuongezee na nyingine,” amesema.

Aidha, Mkuu wa mkoa wa Lindi, Zainab Telack amesema umbali huo wa kilomita 65 ulikuwa ni kielelezo tosha kwamba hapa kulikuwa kunahitaji huduma ya afya.

“Huko tulikokwenda kujenga kote tathmini imefanywa watu waliopo na mahitaji,” amesema.