OFISI ya Msajili wa Vyama vya Siasa, imetoa siku sita kwa Chama cha Demokrasia na Maendeleo (Chadema), kuwasilisha ratiba ya mkutano mkuu. Anaripoti Mwandishi Wetu … (endelea).
Kwa mujibu wa taarifa iliyotolewa na Sisty Nyahozi, kwa niaba ya Msajili wa Vyama vya Siasa, Chadema inatakiwa kuwasilisha ratiba hiyo kabla ya tarehe 11 Novemba 2019.
“Taarifa hiyo iwasilishwe Ofisi ya Msajili wa Vyama vya Siasa, siyo zaidi ya tarehe 11 Novemba 2019, saa tisa na nusu mchana,” inaeleza taarifa hiyo.
Ofisi hiyo imeitaka ratiba ya Chadema ioneshe tarehe ya utoaji fomu za kugombea, uteuzi na uchaguzi wa wanachama wenye nia ya kugombea.
Taarifa hiyo imeeleza kuwa, Chadema kinapaswa kuwasilisha ratiba hiyo ili kurahisisha Ofisi ya Msajili wa Vyama vya Siasa kutekeleza majukumu yake.
“Ofisi ina mamlaka ya kufuatilia uchaguzi na uteuzi wa viongozi wa vyama vya siasa, ili kuhakikisha unafanyika kwa mujibu wa sheria,” imeeleza taarifa hiyo.
Ofisi hiyo ya msajili, tarehe 1 Oktoba 2019 iliiandikia barua Chadema ili kueleza sabababu za kutofanya uchaguzi wa viongozi wa chama, na kukipa siku siku kujibu barua hiyo.
Barua hiyo ilieleza kuwa, Chadema kimevunja sheria kwa kutoitisha mkutano mkuu pamoja na kutofanya uchaguzi wa viongozi wapya, licha ya kipindi cha uongozi wa viongozi wake kikatiba kuisha.
Sehemu ya barua hiyo ilieleza kwamba, Chadema kinapaswa kuwasilisha maelezo yake kwa Msajili wa Vyama vya Siasa, kwanini kisichukuliwe hatua za kisheria kwa kukiuka Sheria ya Vyama vya Siasa, Katiba na Kanuni za hicho.
Barua hiyo ya msajili iliitaka Chadema kuwasilisha maelezo yake ndani ya siku saba, ambapo mwisho ilikuwa leo saa 9.30 mchana.
Tarehe 7 Oktoba 2019, Dk. Vincent Mashinji ambaye ni Katibu Mkuu wa Chama cha Demokrasia na Maendeleo (Chadema), waliandika barua ya kujibu, kwamba waliandika tarehe maalum ya kufanya uchaguzi hup.
“Tumepeleka barua ya majibu asubuhi ya leo (tarehe 7 Oktoba 2019). Ratiba yetu iko pale pale, tarehe 18 Desemba 2019 tutafanya uchaguzi wa viongozi,” alisema Dk. Mashinji.
Hata hivyo, msajili anaitaka Chadema kuwasilisha ratiba ya uchaguzi huo.
Leave a comment