Misoprostol yatumika kutoa mimba, serikali yatoa agizo

SAKATA la watoto wa kike na kina mama kutumia vibaya dawa aina ya Misoprostol kwa ajili ya kutoa mimba, limeibuka bungeni ambapo serikali imetoa agizo jipya kwa maduka ya dawa za binadamu (Famasi) nchini. Anaripoti Regina Mkonde…(endelea).

Akizungumza leo tarehe 31 Mei 2019 bungeni Jijini Dodoma kwa niaba ya Wizara ya Afya, Maendeleo ya Jamii, Jinsia, Wazee na Watoto, Stansilaus Nyongo, Naibu Waziri wa Madini, amepiga marufuku  famasi kuuza dawa hizo kwa wateja wasiokuwa na cheti cha daktari.

Nyongo amesema kabla ya famasi hizo kumuuzia dawa mteja, lazima wahakikishe mteja husika na cheti cha daktari kinachothibisha kwamba ana tatizo ambalo linatibiwa na dawa hizo.

“Dawa hizi zinatakiwa zitolewe chini ya usimamizi wa daktari, yaani daktari anatakiwa aandike dawa hiyo na mgonjwa akienda famasi aende na cheti cha kuweza kupewa dawa hizo. Kweli hizi dawa zina matumizi mengine,”  amesema Nyongo na kuongeza.

“Lakini zinaanza kuzunguka, ziko kwenye famasi na ni za kazi maalum kuzuia damu zisitoke, lakini wana zitumia vibaya sababu ‘side effect’ yake ni kutoa mimba.  Tuna washauri watu wote wenye famasi wasitoe dawa hizi bila cheti,  lazima dawa hizi daktari athibitishe aandike cheti na mgonjwa huyo apewe dawa hizo.”

Nyongo ametoa agizo hilo baada ya Mbunge Amina Mwakilagi kueleza kwamba, kumekuwepo na wimbi kubwa la kina mama na watoto wa kike kutumia vibaya dawa hizo kwa kutoa mimba zisizotarajiwa, kitendo kinachohatarisha usalama wao.

Mwakilagi amesema dawa hizo ambazo ni maalum kwa ajili ya kuzuia damu kutoka, zikitumiwa vibaya zinaweza zikasababisha athari kwa afya za wahusika, na kuhoji mkakati wa serikali katika kuhakikisha kwamba hazitumiwi vibaya.

“Kuna dawa zinaitwa Misoprostol vijana wanafundishana siku hizi wanatumia kutoa mimba , serikali ina mpango gani wa kuzuia dawa hizi,” amehoji Mwakilagi.