Miaka 60 ya Uhuru: Fataki kufyatuliwa maeneo matatu Dar leo

MILIPUKO salama ya fataki inalipuliwa leo Jumatano tarehe 8 Desemba 2021, kuanzia saa 5 usiku, katika maeneo ya Uwanja wa Taifa, Daraja la Kijazi (Ubungo) na Mnazi Mmoja jijini Dar es Salaam, kama sehemu ya sherehe ya maadhimisho ya miaka 60 ya Uhuru wa Tanzania Bara. Anaripoti Mwandishi Wetu, Dar es Salaam … (endelea).

Kilele cha sherehe hizo ni kesho Alhamisi, katika Uwanja wa Uhuru jijini Dar es Salaam, ambapo mgeni rasmi atakuwa Rais wa Tanzania, Samia Suluhu Hassan.

Kamanda wa Polisi, Kanda Maalum ya Dar es Salaam, Jumanne Muliro amesema, mlipuko hiyo itakuwa salama.

Ametoa onyo “kali na tahadhari katika kipindi hiki kuwa mtu yeyote atakaye bainika kujihusisha na vitendo vya kihalifu atashughulikiwa zaidi ya kawaida lakini kwa mujibu wa sheria za nchi.”

Kamanda huyo wa polisi, amewakumbusha wanaoendesha vyombo vya moto, kuzingatia sheria za usalama barabarani ili kuzuia ajali.

Aidha, Kamanda Muliro amesema, vikosi mbalimbali vya jeshi la polisi vikiwemo kikosi cha upelelezi, Field Force Unit (FFU), mbwa na farasi, polisi marine, Polisi Reli na Polisi Main Force (GD) vyote viko kazini lengo likiwa wananchi wote washerehekee maadhimisho ya miaka 60 ya UHURU wa Tanzania kwa amani bila hofu yeyote ile.