June 17, 2021

Uhuru hauna Mipaka

Makonda: Ma-DC bora mchukiwe

Spread the love

PAUL Makonda, Mkuu wa Mkoa wa Dar es Salaam amewataka Wakuu wa Wilaya wa Jiji la Dar es Salaam kusimamia Katiba na Sheria hata kama watachukiwa, anaandika Regina Mkonde.

“… ningependa wakuu wangu wa wilaya mchukiwe kwa kufuata sheria, mhakikishe Katiba na Sheria ndiyo kiongozi wenu,” amesema Makonda leo wakati wa kuwaapisha Wakuu wa Wilaya kwenye Ukumbi wa Karimjee, jijini Dar es Salaam na kuongeza;

“Kazi yenu ni kusimama wakurugenzi ili wakamilishe ahadi za rais (Rais John Magufuli) katika eneo husika. Ni kwamba rais wetu ametupa kazi ya kufanya katikati ya changamoto nyingi.”

Amewataka wakuu hao kuhakikisha wilaya zao zinakuwa salama na kwamba, kazi ya ukuu wa wilaya haina tofauti kubwa ba kazi ya mkuu wa mkoa.

Pia amewataka kuhakikisha kunakuwepo na vyumba vya madarasa vya kutosha pamoja na matundu ya vyoo ili wanafunzi waweze kusoma vizuri.

Akizungumzia usafi wa Jiji la Dar es Salaam amesema “mwezi huu hauwezi kupita bila kuwepo na sheria ya watupa taka barabarani.

“Wakurugenzi hakikisheni mnaweka madastibin (vyombo vya taka) ya kutosha, wafanyabiashara wote kuwa na mahala ya kutupa taka zao,” amesema.

Wilaya wa Mkoa wa Dar es Salaam walioapishwa wameahidi kukabili changamoto sugu ikiwemo ardhi, rushwa na ubovu wa miundombinu hususan barabara.

Sophia Mjema, Mkuu wa Wilaya ya Ilala amesema kuwa, changamoto ya kwanza atakayokabiliana nayo ni ile ya ubovu wa barabara na migogoro ya ardhi.

Aidha Mjema amewataka watumishi wa umma kuzuru katika maeneo yao husika ili kuona changamoto za wananchi na atakaye shindwa kufanya hivyo, aachie ngazi mapema.

Hashim Mgandilwa, Mkuu wa Wialaya mpya ya Kigamboni amesema, kwa kuwa wilaya yake ni mpya atahakikisha anaitangaza ili wananchi wasipate mkanganyiko wanapotaka msaada.

“Tunajua wilaya yetu ya kigamboni inaanza, jambo la kwanza nitakaloanza kufanya ni ugawaji wa kata, hatutaishia hapa mkoa wetu unategemea kigamboni kuwa sehemu ya utalii,” amesema na kuongeza;

“ Kupitia fursa hii tunatakiwa kipaumble chetu kukiweka katika utalii ili kuongeza kipato katika halmashauri yetu na pia nitawekeza katika utangazaji wa wilaya, baada ya hapo ndiyo tutakweda hatua ya pili.”

Kuhusu gharama kubwa ya nauli ya kivuko cha Daraja la Nyerere, Mgandilwa amesema kuwa, ataichukua changamoto hiyo na kuipeleka kwenye mamlaka husika ili kujua namna ya kuipunguza.

Ally Hapi, Mkuu wa Wilaya ya Kinondoni amesema kuwa, katika wilaya yake ipo kamati maalum inayoshughulikia migogoro ya ardhi.

“Ninayo kamati maalum ya wataalamu wanaohusisha wanansheria, maafisa mipango miji wanaosikiliza migogoro ya ardhi wilayani kinondoni.Kwakuwa sisi kinondoni ndiyo nchi, tumeongeza siku ya jumamosi ili kuongeza kasi ya utatuzi wa migogoro ya ardhi,” amesema.

Felix Lyaviva, Mkuu wa Wilaya ya Temeke amesema, katika kutokomeza rushwa katika wilaya yake atatoa namba zake za simu ili kila mwananchi atoe taarifa za mtumishi anayejihusisha na rushwa.

“Nitatoa namba yangu mimi ambayo uniambie wakati wowote katika hili niseme kwamba kama kuna mtumishi wa serikali, taasisi anafikiri rushwa ni sehemu ya maisha yake atafute pa kwenda,” amesema.

Humphrey Polepole, Mkuu wa Wilaya ya Ubungo hakuapishwa kutokana na kutokana na kufiwa na baba yake mzazi.

error: Content is protected !!