Madaktari Muhimbili wahaha kumuokoa Mariam

MARIAM Rajab Mimbe (25), anayesumbuliwa na kidonda kikubwa kwenye mgongo, upande wake wa kulia, anaendelea vizuri na sasa yuko njiani kuelekea katika hospitali ya Ocean Road, jijini Dar es Salaam. Anaripoti Regina Mkonde … (endelea).

Mariam ambaye amelezwa katika hosiptali ya taifa ya Muhimbili (MNH), amepatwa na maradhi hayo, takribani miaka 10 iliyopita.

Akizungumza na waandishi wa habari jijini Dar es Salaam, leo tarehe 24 Aprili, daktari bingwa wa upasuaji katika hospitali hiyo, Ibrahim Mkoma amesema, tayari wamebaini ugonjwa unaomsumbua Mariam.

“Tayari tumegundua maradhi yanayomsumbua Mariam. Tumemfanyia uchunguzi na kesho Jumatano, atahamishiwa hospitali ya Ocean Road ili kuanza matibabu rasmi,” ameeleza.

Hata hivyo, Dk. Mkoma amegoma kutaja ugonjwa unaomsumbua Mariam, ingawa wengi wa wagonjwa wanaopelekwa katika hospitali ya Ocean Road, husumbuliwa na maradhi ya kansa.

Amesema, “…kulingana na maadili yetu ya kazi, ugonjwa ni siri kati ya mgonjwa na daktari wake. Lakini tumechukua vipimo mbalimbali vya damu na tumekwenda maabara ili kubaini aina ya ugonjwa wake.”

Mariam alifikishwa Muhimbili wiki iliyopita, akitokea kijijini kwao, Mnung’una, mkoani Singida.

Alipokelewa katika idara ya magonjwa ya dharura na mara moja akaanza kufanyiwa vipimo  na kupatiwa matibabu yenye lengo la kupunguza maumivu ya kidonda kinachomsumbua.

Dk. Mkoma amesema, wamejua namna ya kumtibu Mariam na kwamba, baada ya kumaliza matibabu yake katika hospitali ya Ocean Road, atarejeshwa Muhimbili kwa uchunguzi zaidi na kufuatilia afya kwa karibu afya yake.

Dk. Mkoma amesema, Mariam amefanyiwa vipimo kadhaa ili kubaini ugonjwa unaomsumbua, ikiwamo CT Scan kwa upande wa kichwa na kifua.

Kwa upande wake, Mariam ameushukuru uongozi wa hospitali ya Muhimbili na serikali kwa ujumla kwa kumpatia matibabu.

Aidha, amewashukuru wananchi wote walioguswa na ugonjwa wake na hivyo kufuatilia kuanzia alipokuwa Singida hadi alipofika Muhimbili na wengine kumsaidia na kumuombea.

“Nawashukuru wote walioniombea na kunitakia afya njema. Sina ninaloweza kuwalipa, bali Mungu atawalipa. Natokea familia ya kimasikini; wazazi wangu hawana uwezo wa kunisaidia tatizo linalonikabili,” alisema Mariam kwa sauti ya masikitiko.