Kamanda Shana afariki dunia

ALIYEKUWA Ofisa Mnadhimu wa Chuo cha Polisi Moshi (CCP), Jonathan Shana amefariki dunia Hospitali ya Taifa ya Muhimbili (MNH) jijini Dar es Salaam alipokuwa akipatiwa matibabu. Anaripoti Mwandishi Wetu, Dar es Salaam … (endelea).

Shana aliyewahi kuwa Kamanda wa Polisi mikoa mbalimbali ikiwemo Simiyu, Pwani, Mwanza na Arusha amefikwa na mauti usiku wa kuamkia leo Jumatano tarehe 16 Septemba 2020.

Msemaji wa Hospitali ya Taifa Muhimbili, Aminiel Aligaesha amethibitisha kutokea kwa kufo hicho cha Kamanda Shana akisema amefikwa na mauti baada ya kualazwa hospitalini hapo kwa siku 21 kati ya hizo tatu alikuwa chumba cha wagonjwa wanaohitaji uangalizi (ICU).

Enzi za uhai wake, Kamanda Shana alikuwa akionekana kujihusisha na shughuli za vyama vya siasa akiwa amevalia sare za polisi jambo ambalo lilikuwa likiibua mjadala.

Mrisho Gambo, aliyekuwa mkuu wa mkoa wa Arusha wakati Shana akiwa kamanda wa polisi wa mkoa huo, ameandika katika ukurasa wake wa Instagram “nimepokea kwa masikitiko makubwa taarifa ya kifo cha Kamanda Shana.”

“Wiki iliyopita nilikwenda kumuona Muhimbili ambako alilazwa karibuni wiki tatu na nilipata matumaini makubwa. Jaman Kamanda Shana! Bwana ametoa na ametwaa – Jina la Bwana libarikiwe,” ameandika Gambo ambaye kwa sasa ni mgombea ubunge Arusha Mjini kupitia CCM