Halima Mdee amponza Askofu Gwajima bungeni

MBUNGE wa Singida Magharibi, Elibariki Kingu, ameshangazwa na kitendo cha Chama Cha Mapinduzi (CCM), kutomchukulia hatua Mbunge wake wa Kawe, Askofu Josephat Gwajima, kufuatia makosa yanayomkabili ya kuichonganisha Serikali na wananchi. Anaripoti Mwandishi Wetu, Dodoma … (endelea).

Akizungumza bungeni jijini Dodoma, leo tarehe 31 Agosti 2021, Kingu amedai kuwa aliyekuwa Mbunge wa Kawe kupitia Chama cha Chadema, Halima Mdee, ambaye kwa sasa ni mbunge viti maalum, hakuwahi kufanya kosa kama hilo.

“Kitendo cha kuwaambia Watanzania kwamba chanjo italeta madhara hii ni hujuma kwa Serikali. Adhabu za Askofu Gwajima zisiishie hapo, hata Mdee hajatufanyia vitimbi namna hii anavyotufanyia Askofu Gwajima. Nashangaa kwa nini CCM mpaka leo hakijamchukulia hatua,” amesema Kingu.

Mbunge huyo wa Singida Magharibi, alitoa kauli hiyo akichangia hoja ya Kamati ya Haki, Maadili na Madaraka ya Bunge, kuhusu mapendekezo ya adhabu dhidi ya Askofu Gwajima na Mbunge wa Ukonga (CCM), Jerry Silaa, waliokutwa na hatia katika tuhuma zilizokuwa zinawakabili.

Mbali na Kingu, Mbunge Viti Maalum (CCM), Mariam Ditopile, amedai kwamba Askofu Gwajima aliwapa mzigo wakati wa kumnadi katika uchaguzi wa Jimbo la Kawe, mwaka jana, kufuatia mgogoro wake na baadhi ya viongozi wa Kanisa Katoliki.

Ditopile amesema kuwa, wakati wa kampeni CCM ililazimika kuomuombea msamaha ili apate kura.

“Vizuri mmemuita (Askofu Gwajima) mbele ya kamati na ameshindwa kuleta vielelezo. Lakini Kawe kwenye chama chetu waligomeba wengi, viligombea vyama vingi alitupa mzigo mkubwa sana ilibidi twende Kanisa la Romani tufute mambo aliyosema na kwa waislamu,’ amesema Ditopile na kuongeza

“Ili chama kimuamini, arudi kwenye mstari.”

Wabunge hao wa CCM, walikutwa na hatia katika makosa ya kudhalilisha na kushusha hadhi ya Bunge, pamoja na kuwachonganisha wananchi na mhimili huo.

Gwajima anadaiwa kutenda kosa kufuatia madai yake ya kwamba baadhi ya viongozi wa Serikali wamepokea hela kumasisha wananchi wachanjwe chanjo ya Ugonjwa wa Korona (UVIKO-19).

Huku Silaa akidaiwa kuwachonganisha wananchi dhidi ya Bunge, baada ya kudai kwamba wabunge hawakatwi kodi katika mishahara yao, kama wananchi wanavyotozwa tozo katika miamala ya simu.

Wabunge hao wamepewa adhabu ya kutoshiriki mikutano miwili mfululizo ya Bunge, pamoja na kupata nusu mshahara katika kipindi wanachotumikia adhabu hiyo.