Dk. Mpango aitaka TFS idhibiti vibali vya ukataji misitu

MAKAMU wa Rais, Dk. Phillip Mpango, ameutaka Wakala wa Huduma za Misitu Tanzania (TFS), kupitia upya sheria za utoaji vibali vya kuvuna mazao ya misitu, ili kudhibiti ukataji holela wa miti kwa ajili ya shughuli za kibinadamu hususan mkaa. Anaripoti Danson Kaijage, Dodoma … (endelea).

Dk. Mpango alitoa agizo hilo tarehe 12 Januari 2023, katika kilele cha upandaji miti kilichoendana na kumbukumbu ya miaka 59 ya mapinduzi ya Zanzibar, jijini Dodoma.

“Ikibidi mpitie upya sheria za utoaji wa vibali vya kuvuna mazao ya misitu ambavyo vitawezesha utunzaji wa mazingira kwa lengo la kuboresha mazingira kwa kuongeza wingi wa kupanda miti,” alisema Dk.Mpango.

Katika hatua nyingine, Dk. Mpango aliagiza Halmashauri ya Jiji la Dodoma, kuwapa adhabu kali ikiwemo faini, watu watakaokutwa na makosa ya kufanya uharibifu wa mazingira.

Wakati huo huo, Dk. Mpango aliziagiza halmashauri zote nchini kupanda miti isiyopungua milioni 1.5, kwa ajili ya kuhamasisha utunzaji wa mazingira kwa wananchi.