DC Dodoma ahimiza viongozi wa dini kupinga ukatili wa kijinsia

MKUU wa Wilaya wa Dodoma, Jabiri Shekimweli ametoa wito kwa viongozi wa dini nchini kuhubiri upendo, amani na utulivu pamoja na kupinga ukatili wa kijinsia ili kuifanya Tanzania iendelee kuwa kisiwa cha amani. Anaripoti Danson Kaijage, Dodoma… (endelea).

Ametoa ushauri huo leo tarehe 4 Desemba 2022 wakati akitoa salama katika kanisa la Karmeli Assemblies of God katika hafla fupi ya kutoa misaada mbalimbali kwa wajane, yatima na watu wanaoishi katika mazingira magumu.

Akizungumza na waumini wa kanisa hilo lililopo Ipagala Jijini Dodoma chini ya Askofu Mkuu Dk. Evance Chande, ameeleza kuwa sasa ukatili umeongezeka kutokana na watu kupunguza upendo na kutokuwa na hofu ya Mungu.

Kutokana na hali hiyo Mkuu huyo wa wilaya amesema iwapo viongozi wataonesha upendo kwa jamii itasaidia kuepukana na unyanyasaji wa kijinsia.

Naye Diwani wa Kata ya Ipagala, Dotto Gombo amesema kitendo kilichofanywa na kanisa kwa kuwapatia mahitaji wahitaji ni jambo ambalo linaonesha upendo wa Mungu kwa wahitaji.

“Kanisa limekuwa likifanya matukio ya kuwajali yatima, wajane na kila mwaka jambo ambalo linaonesha upendo, umoja na wale wenye uhitaji.

Naye Askofu Mkuu wa kanisa hilo Dk. Evance Chande amesema licha ya kuwajali watu wenye uhitaji bado kanisa linaendesha masomo ya ujasiriamali kwa lengo la kuwafanya waumini kujikwamua kiuchumi.

“Serikali haiwezi kutoa ajira kwa watu wote wanaohitimu vyuo, lakini kama vijana watafundishwa jinsi ya kujitegemea ni wazi watajikwamia kiuchumi.

“Tumeanzisha masomo hayo kwa lengo mahususi la kuhakikisha vijana pamoja na wale wenye rika mbalimbali, kuondokana na tabia ya kufikiria kupata ajira na badala yake wajiajiri wenyewe,” ameeleza Askofu Dk.Evance.

Akizungumzia suala la utoaji wa misaada kwa wenye uhitaji Askofu Dk. Chande amesema wanashirikisha uongozi wa serikali za mitaa kwa lengo la kuwapata walengwa.