Chadema: Tundu Lissu ana baraka zetu

CHAMA cha Demokrasia na Maendeleo (CHADEMA) kimesema kinakubaliana na ziara anazofanya Mbunge wa Singida Mashariki, Tundu Lissu nje ya nchi. Anaripoti Regina Mkonde … (endelea).

Akizungumza na wanahabari leo tarehe 14 Februari 2019 jijini Dar es Salaam, Mkurugenzi  wa Mafunzo na Operesheni Chadema, Benson Kigaila amesema chama hicho kinakubaliana na ziara hizo.

Kigaila ameeleza kuwa, Chadema inakubaliana na ziara hizo kwa asimilia mia na ina muunga mkono kwa kuwa hakuna jambo baya ambalo Lissu analifanya kupitia ziara hiyo.

Hata hivyo, Kigaila amesema Chadema haijamtuma Lissu kufanya ziara hizo kwa ajili ya kujitangaza kama inavyodaiwa na baadhi ya watu, bali ni mkakati wake wa kuielezea dunia mambo yanayotokea hapa nchini ikiwemo kuhusu masuala ya kisiasa na tukio lake la kupigwa risasi mwishoni mwa mwaka 2017.

“Chadema inakubaliana na ziara ya Lissu kwa asilimia 100, na ni mkakati wake wa kujitangaza na wala haitangazi Chadema sababu tuna sera yetu ya mambo ya Nje. Tuna muunga mkono sababu hakuna baya analosema, anachofanya anaeleza alichotendewa,” amesema Kigaila.

Ziara za Lissu zilianzia katika bara la Ulaya ambapo alizuru katika nchi za Uingereza, Ubelgiji na kwa sasa yuko nchini Marekani, ambapo katika ziara hizo alizungumza na baadhi ya vyombo vya habari vya kimataifa.