Benki ya NBC yaweka kambi Kanda ya Kaskazini, kuamsha sekta ya utalii, biashara na kilimo

BENKI ya Taifa ya Biashara (NBC) imeelezea dhamira yake ya kukuza na kuchochea ukuaji wa kiuchumi katika mikoa ya Kanda ya Kaskazini kwa kukuunga mkono jitihada zinazofanywa na serikali katika kukuza sekta ya Utalii, kilimo, ufugaji na Biashara. Anaripoti Mwandishi Wetu … (endelea).

Katika kuthibitisha dhamira yake hiyo, viongozi waandamizi wa benki hiyo wakiwemo wawakilishi wa bodi ya wakurugenzi, wakurugenzi na wakuu wa Idara mbalimbali wa benki hiyo mwishoni mwa wiki walitembelea mikoa ya Manyara, Arusha na Karatu wakilenga kukutana na wateja wao katika sekta hizo ili kwa pamoja waweze kujadili fursa za kibiashara, mipango ya ukuaji na huduma mpya zitolewazo na benki hiyo.

Akizungumza kuhusu matukio hayo, Mkurugenzi wa Kitengo cha Biashara kwa wateja binafsi Benki ya NBC, Elibariki Masuke alisema kupitia hatua hiyo wameweza kukutana na wateja wao na hiyo hatua kupata wasaa wa kutambulisha huduma zao mpya sambamba na kupokea mrejesho kuhusu mahitaji ya wateja wao hususani kipindi hiki ambacho mikoa hiyo ipo kwenye mkakati wa kuboresha zaidi sekta ya utalii.

“Rais wetu na serikali kwa ujumla wamefanya jitihada kubwa katika kuinua sekta ya utalii na hivyo sisi kama wadau muhimu kwenye hilo tumeona tuje kumuunga mkono kufanikisha adhma yake hiyo. Kupitia huduma yetu ya NBC Biashara Club tumeweza kukutana na walengwa ambao ni wateja wetu na tumeweza kujadili na kuwasilisha huduma zetu mpya zinazoendana na dhamira hii kuu ya kukuza utalii ikiwemo huduma yetu ya mikopo ya magari ya utalii huku dhamana ikiwa ni magari yenyewe,’’ alisema.

Alitaja huduma nyingine kuwa ni pamoja na huduma ya mikopo ya zana za kilimo yakiwemo matrekta huku dhamana ikiwa ni kifaa chenyewe, mikopo ya wazabuni pamoja na mikopo ya wafanyabiashara wanaonza biashara inayofahamika kama ‘NBC Kua Nasi’.

Kwa upande wake Mkurugenzi wa Kitengo cha Biashara kwa wateja wadogo na wa kati wa benki hiyo, Bw Elvis Ndunguru alisema kupitia dhamira hiyo, benki hiyo inatarajia kuboresha zaidi huduma yake ya malipo ya POS ili kuongeza ufanisi katika ukusanyaji wa mapato yakiwemo yale ya fedha za kigeni.

“Sekta ya utalii inachangia zaidi ya asilimia 25 ya fedha za kigeni. Kwa hiyo uboreshaji wa mfumo wa ukusanyaji wa mapato ni muhimu sana hivyo mwisho mwa mwezi huu tunataraji kuzindua huduma yetu ya POS iliypboreshwa zaidi kwa ajili ya malipo ya Dolan a Shilingi. Na pia tunatarajia kuongeza huduma ya American Express kwenye mfumo huo ili kuhudumia pia wateja wa Marekani,’’ alisema.

Akizungumzia hatua ya benki hiyo, Mkuu wa Mkoa wa Arusha Bw John Mongella alisema imekuja wakati muafaka kwa kuwa kupitia jitihada za Rais Samia Suluhu na serikali za kuboresha sekta ya utalii nchini, ukanda huo unatarajia kupokea watalii wengi zaidi mwaka huu, hivyo maboresho zaidi katika huduma za kifedha ni muhimu.

“Kwa mfano mkoa wetu wa Arusha tunategemea utalii kwa asilimia 80.Tayari Rais ameshafanya jitihada nyingi za kufanikisha ukuaji wa sekta ya utalii kilichobaki ni sisi viongozi na wadau wengine kumuunga mkono kama wanavyofanya NBC kwasasa. Tunaamini jitihada zao hizi mbali na sekta ya utalii tutaona mabadiliko makubwa katika sekta za kilimo, biashara na ufugaji pia…tunawashukuru sana,’’ alisema.

Akiishukuru benki hiyo kwa niaba ya wateja wote, Muhandisi Matoleo Ouden ambaye ni mfanyabiashara jijini Arusha alisema kupitia ujio wa viongozi hao waandamizi wameweza kupata wasaa wa kuwasirisha mahitaji yao kwa viongozi waandamizi wa benki hiyo ili yaweze kufanyiwa kazi na maamuzi kutoka ngazi ya juu.