Bandari ya Kigoma kuongezewa uwezo wa kutoa huduma zake

SERIKALI kupitia mamlaka ya Bandari nchini (TPA), imewekeza takribani Sh. 800 bilioni, ili kutekeleza miradi ya uboreshaji wa bandari zake. Anaripoti Mwandishi Wetu, Kigoma … (endelea).

Lengo la mpango huo, TPA inasema, kunalenga kuongeza ufanisi katika utoaji wa mizigo na usafirishaji wa abiria nchini.

Akizungumza na waandishi wa habari mjini Kigoma, tarehe 2 Juni 2023, Meneja wa Bandari za Ziwa Tanganyika, Edward Mabula, ameeleza kuwa upanuzi na ukarabati wa bandari uliopangwa kufanyika, utasaidia maboresho sekta ya usafirishaji na kuondoa kero kwa wasafiri.

Ametolea mfano wa bandari ya Kigoma, kwamba imewezesha kupunguza msongamano wa mizigo katika bandari ya Dar es Salaam, ambapo hadi kufikia tarehe 31 Mei mwaka huu, imehudumia takribani tani 131,000 za mzigo.

Amesema, idadi hiyo ni sawa na asilimia 48 ya shehena zote zinazohudumiwa katika bandari zote za ukanda wa Ziwa Tanganyika ambapo ni tani 273,000 na kusisitiza kuwa asilimia kubwa ya mizigo inayopitia Dar es Salaam, inasafirishwa kuelekea nchi jirani ya Jamhuri ya Kidemokrasia ya Kongo (DRC).

Amesema, “asilimia 80 ya mizigo inayohudumiwa na bandari ya Dar es Salaam, inakwenda DRC); katika mizigo hiyo, asilimia 48 husafirishwa kupitia bandari ya Kigoma.”

Kwa upande wa Ziwa Tanganyika, mamlaka hiyo imewekeza Sh. 100 bilioni, ili kuboresha bandari za ukanda huo, ambazo zimekuwa zikitumika kutoa huduma ya usafirishaji wa abiria na mizigo kuelekea nchi jirani.

Kutokana na hali hiyo, Mabula ametoa wito kwa wadau wa bandari na sekta binafsi, kuchangamkia fursa zinazotokana na uboreshaji wa bandari za Ziwa Tanganyika.

Kwa upande wake, msimamizi wa mradi wa uboreshaji wa bandari za Kibirizi na Ujiji, Elly Mtaki, ameeleza kuwa kukamilika kwa mradi huo, kutaongeza ufanisi katika upakuaji na upakiaji wa mizigo.

“Mamlaka imeamua kujenga gati mpya katika katika bandari ya Kibirizi, ambayo kukamilika kwake, kutaharakisha utoaji wa huduma,” ameeleza Mhandisi Mtaki.