Gerald Kitabu

Mwandishi Guardian, ajitosa ubunge Katavi

Spread the love

MWANDISHI   wa  gazeti la The Guardian Gerald Kitabu  amejitosa katika kinyang’anyiro cha ubunge katika Jimbo   la  Nsimbo   Mkoa wa Katavi  kupitia  chama cha Demokrasia na Maendeleo (CHADEMA). Anaandika Jimmy Mfuru … (endelea)

Kitabu  ambae ni mshindi wa tuzo ya uandishi wa habari ya SADC ambayo hutolewa kwa mwandishi bora anaeandika habari za  maendeleo na mazingira katika nchi za jumuiya ya nchi za kusini mwa Afrika, alichukua fomu hizo hapo   katika  ofisi za  Chadema  jimbo la Nsimbo  zilizopo  katika kijiji  cha  Songambele, Tarafa ya  Nsimbo  Wilaya ya Mlele, Mkoani Katavi.

Kadhalika, Mbali na kushinda tuzo ya SADC, mwandishi  huyo pia hivi karibuni alishinda tuzo mbili kubwa katika nafasi ya kwanza, moja ikiwa ya TANAPA (2013), na nyingine ya Baraza la Habari Tanzania (MCT) (2014) katika kipengele cha mazingira.

Akizungumza   na mamia ya wafuasi wa chama hicho pamoja na wananchi wa jimbo la Nsimbo waliokusanyika katika ofisi za chama hicho jimboni hapo,  amesema  amesukumwa na uzalendo wake kwa jimbo hilo kutokana na changamoto kadhaa zinazowakabili wananchi wa jimbo hilo.

Alizitaja baadhi ya changamoto hizo kuwa ni pamoja na usimamizi mbovu wa rasilimali, mikataba ya hovyo  isiyojali maslahi ya wananchi na taifa ikiwemo mikataba ya uwekezaji  katika kilimo, na rushwa hali ambayo imepelekea  huduma duni za jamii kama vile maji, barabara, afya na elimu.

“Miaka michache iliyopita, kuna mkataba mmoja wa Katumba na Mishamo ulisainiwa kati ya  viongozi wa Halmashauri ya wilaya ya Mpanda na mwekezaji wa kampuni ya AgriSol kutoka Marekani. Katika mkataba ule wa miaka 99, ikitokea kuna mgogoro kati yao na mwekezaji, unawalazimu wananchi husika kwenda kusikiliza kesi Uingereza  hali ambayo wananchi maskini hawawezi kumudu gharama za usafiri na mawakili wa kuwasimamia ” alisema Kitabu.

Aidha, alizitaja kero nyingine kuwa ni kukithiri kwa aina mbalimbali za ushuru wa mazao ambao unaishia mifukoni mwa wajanja  wachache hali ambayo ina lalamikiwa sana na wakulima na wafanya biashara  hapa mkoani.

“Soko la Mkoa lina vibanda 356 na meza 284. Kila banda linalozwa ushuru wa sh. 15,000/- kwa mwezi, wakati meza moja inatozwa sh. 300 kwa siku ambayo ni sawa na sh.9,000 kwa mwezi. Hii ina maana kwamba jumla ya mapato yote kwa mwezi ni zaidi ya shilingi milion 7 na nusu. Cha ajabu pamoja na mapato makubwa, soko linazidi kuwa kongwe na chafu hata kufikia hatua ya kukimbiwa na baadhi ya wateja wastarabu wakiwemo baadhi ya watalii wanaokuja kutembelea Hifadhi ya taifa ya katavi” amesema.

Amesema   endapo  atapitishwa na chama chake kipaumbele chake kitakuwa kuweka mipango thabiti inayotekelezeka ikiwemo ufuatiliaji wa mikataba mibovu na usimamizi wa rasilimali zilizomo kama vile madini.

“Nina imani na chama changu ambacho kipo mbele kupiga vita ufisadi wa aina yoyote, tukiweza kupiga vita rushwa na tukasimamia vizuri rasilimali zetu na mapato yatokanayo na ushuru, maendeleo ya haraka yatapatikana katika jimbo langu na Mkoa kwa jumla” amesema.

Aidha,amesema  Mpanda ina vipaji vingi, atahakikisha kuwa michezo ya aina yote inapewa kipaumbele ili kuinua vipaji vilivyokuwepo hapo awali.

Katika zoezi hilo la kuchukua fomu, wafuasi wa chama hicho, akina mama na vijana  walimchangia pesa ya kuchukua fomu jumla ya sh.250,000.

MWANDISHI   wa  gazeti la The Guardian Gerald Kitabu  amejitosa katika kinyang’anyiro cha ubunge katika Jimbo   la  Nsimbo   Mkoa wa Katavi  kupitia  chama cha Demokrasia na Maendeleo (CHADEMA). Anaandika Jimmy Mfuru ... (endelea) Kitabu  ambae ni mshindi wa tuzo ya uandishi wa habari ya SADC ambayo hutolewa kwa mwandishi bora anaeandika habari za  maendeleo na mazingira katika nchi za jumuiya ya nchi za kusini mwa Afrika, alichukua fomu hizo hapo   katika  ofisi za  Chadema  jimbo la Nsimbo  zilizopo  katika kijiji  cha  Songambele, Tarafa ya  Nsimbo  Wilaya ya Mlele, Mkoani Katavi. Kadhalika, Mbali na kushinda tuzo ya SADC, mwandishi  huyo pia…

Review Overview

User Rating: Be the first one !

About Masalu Erasto

Leave a Reply

Your email address will not be published.

error: Content is protected !!