Majimbo manne yafutwa Z’bar

TUME ya Uchaguzi Zanzibar (ZEC), imefuta majimbo mane ya uchaguzi visiwani Zanzibar. Anaripoti Regina Mkonde, Dar es Salaam … (endelea).

Jaji Mkuu Mstaafu, Hamid Mahmoud Hamid, Mwenyekiti wa ZEC ametangaza uamuzi huo leo tarehe Alhamisi tarehe 2 Julai 2020.

Baada ya mabadiliko hayo, kwa sasa Zanzibar ina majimbo 50 badala ya 54 ilivyokuwa awali, ambapo Unguja ina majimbo 32 na Pemba 18.

Jaala Makame, Afisa Habari wa ZEC, akizungumza na MwanaHALISI ONLINE kwa simu, amesema majimbo manne yaliyofuta yanatoka upande wa Unguja.

Makame amesema, mabadiliko hayo hayajagusa upande wa Pemba. Hata hivyo, hakuwa tayari kueleza sababu za kupunguzwa kwa majimbo hayo.

“Ni sahihi, majimbo manne ya Unguja yamepunguzwa, upande wa Pemba hakuna mabadiliko yoyote,” amesema Makame.

Mabadiliko hayo yamekuja mwezi mmoja baada ya Chama cha ACT-Wazalendo, kulalalamika kwamba ZEC ina mpango wa kupunguza majimbo visiwani humo.

Malalamiko hayo yalitolewa tarehe 30 Mei 2020 na Nassor  Ahmed Mazrui, Naibu Katibu Mkuu wa ACT-Wazalendo Zanzibar, siku kadhaa baada ya ZEC kuanzisha mchakato wa upokeaji maoni ya vyama vya siasa na wananchi kuhusu kupitia upya mipaka ya majimbo ya uchaguzi Zanzibar.

Katika taarifa yake hiyo, Mazrui alisema chama chake hakiungi mkono zoezi la ukataji upya wa majimbo kwa madai kwamba ni kinyume cha Katiba ya Zanzibar ya mwaka 1984, inayotaka majimbo yakatwe kila baada ya miaka 8 hadi 10.

Mazrui alisema mara ya mwisho ZEC ilikata majimbo mwaka 2015, hivyo miaka 8 bado haijafika.