Mnikulu wa Ikulu, Shaban Gurumo akiapa mbele ya Kamati ya Maadili kwa Watumishi wa Umma

Kigogo wa Ikulu akiri kupokea fedha za ESCROW

Share on FacebookShare on Google+Tweet about this on TwitterShare on LinkedIn

SHABANI Gurumo- mtumishi wa Ikulu mwenye cheo cha mnikulu, leo amefikishwa mbele ya Baraza la Sekretarieti Maadili ya Viongozi wa Umma akikabiliwa na kosa la kukiuka maadili kwa kupokea sh. 80,850,000.

Mnikulu huyo anadaiwa kupokea mgawo huo kutoka kwa mfanyabiashara na mmiliki wa Kampuni ya VIP Engineering and Marketing Ltd, James Rugemalira, Anaripoti Deusdedit Kahangwa…(endelea).

Mbele ya Baraza linalokutana katika ukumbi namba 2 wa Karimjee jijini Dar es Salaam, Gurumo alisomewa mashtaka kadhaa na mwanasheria wa sekretarieti hiyo, Hassan Mayunga.

Kwa mujibu wa Mayunga, Gurumo anatuhumiwa kukiuka vifungu mbalimbali vya sheria ya maadili ya viongozi wa umma namba 13 ya mwaka 1995 kama ilivyorekebishwa mwaka 2001.

Katika shitaka la kwanza, Gurumo alidaiwa kufanya kazi bila kuzingatia viwango vya juu vya maadili na hivyo kushindwa kulinda na kuimarisha imani ya wananchi na matumaini katika uadilifu, haki na kutopendelea kwa serikali, jambo ambalo ni kinyume cha ibara ya 6 (a) ya sheria ya maadili ya viongozi wa umma.

Katika shitaka la pili, Gurumo alidaiwa kushindwa kupanga mambo yake kwa namna ambayo ingezuia kutokea kwa mgongano halisi wa maslahi au kuwepo na uwezekano wa mgongano au kuonekana kuwepo mgongano wa mashali katika utendaji kazi wake, jambo ambalo ni kinyume cha ibara ya 6(e) ya sheria ya maadili ya viongozi wa umma.

Katika shitaka la tatu, Gurumo alidaiwa kuomba na kupokea fadhila za kiuchumi ambazo sio zawadi ndogo, wala ukarimu wa kawaida au fadhila ya thamani ya kawaida, jambo ambalo ni kinyume cha ibara ya 6(f) ya sheria ya maadili ya viongozi wa umma.

Katika shitaka la nne, Gurumo alidaiwa kupata kwa makusudi manufaa makubwa ya kifedha, jambo ambalo ni kinyume cha ibara ya 12(1)(e) ya sheria ya maadili ya viongozi wa umma.

Na katika shitaka la tano, Gurumo alidaiwa kupokea zawadi yenye thamani inayozidi shilingi 50,000 na kukataa kuitaja na kuikabidhi zawadi hiyo kwa Afisa Mhasibu wa ofisi inayohusika kinyume cha ibara ya 12(2) ya sheria ya maadili ya viongozi wa umma.

Mwansheria wa Sekretarieti alilieleza Baraza lenye wajumbe watatu, chini ya uenyekiti wa Jaji mstaafu Hamis Msumi, kwamba Gurumo alipokea shilingi 80, 850,000 kutoka kwenye Kampuni ya VIP Engineering and Marketing Ltd tarehe 05 Februari 2014.

Mwanasheria lisema kuwa fedha hizo zilipokelewa kupitia akaunti namba 00110102645401 inayomilikiwa na Gurumo katika Benki ya Mkombozi Dar es Salaam baada ya akaunti hiyo kufunguliwa tarehe 04 Februari 2014.

Pia, mwanasheria huyo aliliambia Baraza kwamba, kufikia 18 Desemba 2014, tayari kigogo huyo wa Ikulu alikuwa amechukua kiasi cha shilingi 77,529,100 kutoka kwenye akaunti hiyo kwa ajili ya matumizi binafsi.

Kadhalika, mwansheria alilieleza Baraza kwamba, tayari sekretarieti ya maadili ilikwisha mhoji Gurumo kuhusu fedha hizo na akakiri kumiliki akaunti hiyo ambako fedha hizo ziliingizwa.

Baraza liliarifiwa kuwa Gurumo alikiri kwamba ndiye aliyehusika na miamala ya kuchukua kiasi cha shilingi 77,529,100  kutoka katika akaunti hiyo.

Mara tu baada ya Gurumo kusomewa mashtaka hayo, huku akiongozwa na wakili wake, Lucas Charles kutoka Kamanija and Co Advocates ya Buguruni Malapa Dar es Salaam, alisema mambo matatu makubwa.

Kwanza, alikanusha kupokea “zawadi” kutoka kwa mfanyibiashara James Rugemalira; pili alikanusha kupokea “zawadi” kutoka kwenye kampuni ya VIP Engineering and Marketing Ltd; na tatu alikiri kupokea “fedha” kiasi cha shilingi 80,850,000 kutoka kwa James Rugemalira.

Kwa mujibu wa Gurumo alichopewa ni “fedha” lakini sio “mshahara, posho, urithi, na wala zawadi”.

Majibu haya tata yalizua mshangao kwa wananchi waliokuwepo. Pia yalizua mvutano mkubwa kati ya Gurumo na wanasheria wa sekretarieti ya maadili, kwa upande mmoja, na pia mvutano kati ya wanasheria hawa na wakili wa Gurumo, kwa upande mwingine.

Baada ya mahojiano hayo ya kusisimua Mwenyekiti wa Baraza aliahirisha kikao na kuwataka wanasheria wa sekretarieti na wakili wa Gurumo kuwasilisha utetezi wao wa mwisho kabla ya 13 Machi 2015. Baada ya hapo ataandika hukumu na kuiwasilisha kwa Rais Kikwete. Alisema kuwa hukumu ya aina hiyo haisomwi hadharani na Gurumo pamoja na wakili wake hawatapata nakala.

Kwa mujibu wa ratiba iliyotolewa na Baraza la Maadili  viongozi mbalimbali serikalini wanaendelea kuhojiwa kwa tuhuma za kukiuka taratibu za utumishi wa umma katika kutekeleza majukumua yao.

Kufikia 04 Machi 2015, tayari  Mbunge wa Bariadi Magharibi, Andrew Chenge; aliyekuwa Waziri wa  Ardhi, Nyumba na Makazi, Prof. Profesa Anna Tibaijuka; Mkurugenzi wa Sheria wa Wizara ya Ardhi Nyumba na Maendeleo ya Makazi, Rugonzibwa Mujuna; na  Mnikulu Shaban Gurumo wamehojiwa.

Mkurugenzi Mkuu wa Wakala wa Ufilisi na Udhamini (RITA), Philip  Saliboko; Naibu Kamishna  Upelelezi na Kodi Mamlaka ya Mapato Tanzania  (TRA), Loicy Appollo; Mkurugenzi  Mdhibiti  Uchumi Mamlaka ya Usafiri wa Anga, Dk. Benedict Diu; Meya wa Halmashauri ya  Manispaa ya Tabora, Gulam Remtullah; na aliyekuwa Mkuu wa Wilaya ya  Korogwe, Mrisho Gambo ni miongoni mwa watu ambao wanatarajiwa kuhojiwa na Baraza la Maadili muda wowote kuanzia sasa.

Share on FacebookShare on Google+Tweet about this on TwitterShare on LinkedIn

About Masalu Erasto

Visit Us On FacebookVisit Us On TwitterVisit Us On Youtube